Auzoa berritzeko lanak nola egin aukeratu zuten astelehenean Anuska auzoan. 159 auzotar zeuden bozkatzera deituta eta horietatik 62 (%40) hurbildu ziren beraien iritzia ematera. 30 auzotarrek, hau da, gehiengoak horrela eskatuta, Kale Nagusia 62 eta 64 atarien inguruko lanekin hasiko dira; 1go aukerarekin.
Udalak jakinarazi duenez, herritarrekin hartutako konpromisoari heldu eta lanak ahal bezain laister hasiko ditu inguru horretan. Horrela, Kale Nagusia 62 eta 64 atarien inguruan instalazioak lurperatuko dira, 2 metroko zabalera duten espaloiak jarriko dira, aparkalekuetako “topeak” kenduko dira, jolasgunea berrituko da eta plazatxoko eskailerak berrituko dira.
Datozen urteetan ere, auzo hau berritzeko lanak egiten jarraituko du Udalak, urtean, gutxienez, 125.000 euro inbertituta. Pixkanaka fase guztiak osatzea da helburua.
Udalak poztasuna azaldu du kontsultan parte hartu duten herritarren kopurua ikusita eta etorkizunerako mota honetako ekimen gehiago antolatzeko asmoa azaldu du.