Hernaniko Gazte Olinpiadak bukatzeko gutxi gelditzen da. Datorren larunbata izango da azken eguna, ekainaren 21a. Hala ere, oraindik lan asko izango dute 22 taldeek.
Gaurko proba Ereñotzun egingo da, bertako festen barruan. Eta ez da nolanahikoa izango! Triatloi Olinpikoa prestatu dute, Urumea ibaiaren bueltan. Baina goizean, Hernanin jarri dute zita, murala margotzeko.
Goizean murala, Axpirekin
Ereñotzuko proba arratsaldean egingo da, baina goizean izango da zeregina. Murala margotuko dute aurten ere, eta Axpi komikigilearen laguntza izango dute.
Margotzeko gogoa duten guztiak Garin tabernan elkartuko dira, goizeko 11:00etan.
Arratsaldean, Ereñotzura
Proba arratsaldeko 16:00ak inguruan hasiko da, Ereñotzun. Talde bakoitzetik 8 partaide beharko dira, eta erreleboak egingo dira. Lehenengoak errekan behera jaitsi beharko du. Bigarrenak errekan gora egin beharko du piraguan. Hirugarrenak, berriz, behera, piraguan baita ere. Laugarrenak uretako azken erreleboa egingo du, baina igeri. Behin lehorrean, erreleboka beste lau taldekidek korrika egin beharko dute. Erreleboak emateko koxka: esaera zaharrak esatea belarrira!
Autobus zerbitzua
Ereñotzura joateko autobus zerbitzua egongo da. Zinkoeneatik 14:30etan aterako da, eta bueltan, 20:00etan.