Azken 16 urteetan egin den moduan, biharko Preludio edo Iragarpen kontzertuaren aurretik, haurren txanda izango da gaurkoan.
Gaur arratsaldeko 19:00etan Plazan emango dute San Joanetako Haurren XVI. Iragarpen Kontzertua Elizatxo, Inmakulada, Langile eta Urumea ikastetxeetako ikasleek, Ttarla dantza taldeko dantzari gaztetxoek eta Hernani eta Kantuz Musika Eskoletako ikasleek. Guztira, 8 doinu izango dira.
Doinu herrikoi eta berriak
Kontzertua txalaparta doinuekin hasiko da, eta jarraian, Ttarla dantza taldeko dantzariak ariko dira, Hernani Musika Eskolako txistulariek lagunduta. Trikitilariek jarraituko dute gero. Handik aurrera, abesbatzak eta musikariak elkarrekin ariko dira: Non geratzen den denbora (M.Urangarin eta K.Uribe), Ilargia (Ken7)... Bukatzeko, nola ez, Hernaniko martxa, Mendirik Mendi eta San Juan zortzikoa.