Kanpotik etortzen diren pertsona edo kulturei buruz hainbat eta hainbat zurrumurru entzun dira gure herrietan, eta horri aurre egiteko sarea sortu dute Gipuzkoan: Zurrumurruez! Sarea. 7 herrik, tartean Astigarragak, eta SOS Arrazakeria taldeak jarri dute martxan. Aurrera begira, Gipuzkoako herri gehiagok bat egitea da asmoa. Hori horrela, datorren ikasturtean sentsibilizazio kanpaina bat egingo dute. Besteak beste, antzerki munduarekin lan egingo da, bertsolariekin, komiki-txartelak aterako dira, foiletoak, zurrumurruen kontrako panelak, triptikoak... eta abar.
Sarearen sortzaile eta udal ordezkariek ostegunean aurkeztu zuten egitasmoa eta azaldu zuten beste kultura batzuetako jendeari buruz ari garenean, sekulako aurreiritzi eta zurrumurru pila azaltzen direla: «Etorkinak gizarte laguntzetatik bizi dira; bizi diren lekuetan segurtasun arazoak izaten dira; osasungintza modu abusibo batean erabiltzen dute; ez dute integratu nahi... Ez dira egia, eta demostratuta dago».