Espainiako Legebiltzarrean EAJko senataria da Iñaki Anasagasti, 2008az geroztik. Hainbat liburu argitaratu ditu, politikaren eta monarkiaren inguruan. Bihar Hernanin izango da hitzaldia ematen, eta besteak beste, hitz egingo du Juan Carlos erregearen abdikazioaz, Kataluniako egoeraz, Europako hauteskundeetako emaitzez...
Zer da zuretzat Espainiako monarkia?
Diktadorearen inposizioa. Ez zen monarkia berrezarri belaunaldi segida jarraituz; Francok ezarritako monarkia izan zen, Mugimenduko Monarkia hasteko.
Monarkia behin betiko kentzeko aukera galtzen ari al gara?
Ez dut uste. Abdikazioaren txapuzaren ondoren, lo zegoena esnatzen ari da, eta diskurtso marginala zena indartzen.
Alderdi batzuek esana da: «Espainiako monarkia ez da Euskal Herrikoa, eta beraz, ez da gure arazoa»
Hala da. Errespetu instituzionala izan dugu, demokratak gara, Euskal Errepublika Agirrek aldarrikatu zuen 1931n. Baina solidaritatea adierazten diegu isilarazitako errepublikar espainiarrei eta mespretxua jaso dutenei, baita alderdi sozialistaren aldetik ere.
Errepublikak zein aldaketa ekarriko lizkiguke? Zenbat aurreztuko genuke euskaldunok?
Kupoaren bitartez ordaintzen ditugun aurrekontuen %6,24 aurreztuko genuke. Errepublika mila aldiz merkeagoa da errege kapritxoso, xahutzaile eta kontrola ezin baten gastuak baino. Errepublikarekin bakeak egingo genituzke demokraziarekin. Pertsona bat, boto bat. Eta modernizatu egingo ginateke, eta basailu edo menpeko izateari utziko genioke, belaunikatzeari utzi. Maiordomoak bukatu egingo lirateke.
Vianako printze legitimoaren ondorengoa, euskaldunon erregea, ba omen dago. Hori nahiago?
Ez. Botoa gustatzen zait agintari eta ordezkariak aukeratzeko. Erregeak, kartetan.