Erabakitzeko eskubidearen alde, Durango eta Iruñea elkartuko dituen giza katea bihar egingo da eta bertan izango dira Astigarraga, Hernani, Ereñotzu, Arano eta Goizuetako herritarrak ere. Denek, Etxarrenen dute hitzordua giza katea osatzeko. Bost herrietan, 1.500 metrotik gora saldu dira. Hernani eta Ereñotzuri 101 km-a dagokie eta Astigarraga, Arano eta Goizuetari, 102 km-a. Giza katea 12:00etan izango da, baina 10:00etarako bertan egoteko eskatu dute antolatzaileek.
Autobusetan, ordu desberdinak
Herrietatik autobusak aterako dira. Astigarragako autobusak 08:30etan abiatuko dira Joseba Barandiaran plazatik. Giza katea bukatzean, Etxarrira joango dira, bertan egingo den jaialdira. Etxerako buelta, Etxarritik izango da, 18:30etan.
Goizuetako autobusa ere 08:30etan abiatuko da. Bi autobus aterako dira. Horietako bat, giza katea bukatu bezain pronto herrira itzuliko da, baina bestea Etxarrira joango da. Etxarritik 19:00etan izango da buelta. Aranotik kotxeetan joango dira.
Ereñotzun eta Hernanin ere, bi aukerak jarri dituzte. Eta giza katea bukatu eta 13:00ak aldean etxera bueltatuko direnek, 07:30etan (Ereñotzu) eta 08:00etan (Hernani) izango dute autobusa, Etxarrenera joateko. Han, gosaria emango zaie, debalde. Autobus hauek bi buelta egin behar dituzte, autobus nahikorik ez baitago. Arratsaldean bueltatuko direnek, berriz, 08:45etan eta 09:00etan izango dute. Hernanin emango zaie gosaria. Etxarritik 19:00etan bueltatuko dira.
Urumeako herritarren gunea Etxarrin izango da. 14:00etatik aurrera izango dira ekitaldia eta kontzertuak: Vendetta, Xaiko eta Tximeleta.
Kilometroa kotxean jarri
Dena ondo atera dadin, gomendio batzuk eman dituzte: janaria eta ura eraman; haurrentzako denbora pasatzeko jolasak edo zerbait eraman (pinturak, sokasaltoa, goma...); 0-3 urtekoentzat maxicosia autobuserako; adineko pertsonentzat aulki plegableak; bukatzean, hondakin guztiak jaso...
Eta kotxean doazenentzat: folio batean 101 edo 102 km idatzi (bakoitzari dagokiona) eta aurreko kristalean eraman.
Autobusen irteera ordua
Ereñotzu: 07:30 (t.urdina) eta 08:45.
Hernani: 08:00 (t.urdina) eta 09:00.
Astigarraga: 08:30, J. B. plaza.
Goizueta: 08:30.