Donostiaren aurka jokatuko du Herriarteko Txapelketako final laurdena Astigarragak. Ostiralean izango dira joaneko partiduak, 19:30etan, Astigarragako pelotalekuan. Lehia zaila izango dela azaldu du Joxe Mari Zubiarrain arduradunak, baina esperantzarekin daude.
Joan den ostiralean Astigarragak 2-1 irabazi zion Arrasateri final zortzirenetako bueltako neurketa. Kadeteek eta nagusiek irabazi zuten. Denera: Astigarraga 4-Arrasate 2.
Kadeteetan, Gorka Oiarbidek eta Hodei Expositok partidu ederra jokatu zuten; 22-1 nagusitu ziren. Garaipen horrekin, 12 tanto besterik ez zituen behar Astigarragak sailkatzeko eta jubeniletan, Maikel Ruiz eta Argoitz Otañok 12 tanto egitean, eskuak babestera jokatu zuten. 14-22 galdu zuten. Xabier Barandiaran eta Jokin Santxez gozatzera atera ziren eta 22-8 irabazi zuten.