Bertako produktuen alde egiteko hainbat proposamen egin zizkioten atzo Hernaniko ikasleek Udalari. Produktu horiek azoketan eta denda txikietan saltzen dira gehien, eurek adierazi zutenez, eta Udalari eskatu zioten bi salmenta horiek indartu egin behar direla. «Denda horiei propaganda egitea» edo Gudarien plaza «azoka haundi» bihurtzea, izan ziren bi proposamen. Supermerkatuei ahalegin bat eskatzeko ere esan zioten Udalari, akordio baten bidez eta abar.
Urtero bezala, Pleno Aretoan ikasleek hartu zuten txanda, atzo, eta orokorrean janarien jasangarritasunari buruz aritu ziren. Bertako eta kanpoko janariak, transgenikoak eta ekologikoak, azokak, denda txikiak eta supermerkatuak...
Jendeak supermerkatuetan erosten du
Hernaniko ikastetxeek Haur Hezkuntzatik hasi eta Batxilergoraino landu dute gai hau, eta hainbat gauza ikusi ondoren, ondorio batzuk atera dituzte, Hernaniko egoerari buruz. Ondorio nagusiak, hauexek: hernaniarrek supermerkatuetan egiten dituzte erosketak; produktu freskoak orokorrean azokan eta denda txikietan saltzen dira; janariak nongoak diren jakitea ez da beti erraza, eta ez zaio askotan garrantziarik ematen; baserritarrei gutxi erosten zaie, kasu askotan eskura ez dagoelako; etxean produktu transgeniko ugari dauzkagu; zaila da herriko dendetan produktu ekologikoak aurkitzea.
Etxean produktu transgeniko ugari dauzkagula da, ateratako ondorioetako bat.
Konpromisoak, bai haurrek eta bai Udalak
Hainbat konpromiso hartu dituzte ikasleek, eta baita Udalak ere, ikasleen eskaerak entzunda. Bertako eta garaiko produktuak erostea; azoketan eta denda txikietan gehiago erostea; fruta gehiago jatea eta litxarkeria gutxiago; janariak biltzeko paper berrerabilgarriak ibiltzea; kirol gehiago egitea; erosketak egitean ez begiratzea soilik prezio merkeenari... Horrez gain, baita ere, produktu ekologikoak bilatzen saiatzea; bildu gabeko produktuak bilatzen saiatzea, baserritarrei produktuak zuzenean erostea...
Eskolak berak ere hartu ditu konpromisoak: jangeletako hondakinak ondo kudeatzea; gosari osasuntsuen kanpaina egitea; urtebetetzeetako jatekoak arautzea; astean behingo hamaiketakoa fruta izatea; baratzak sortzea; hitzaldiak eta abar antolatzea, irakasle, guraso eta langileak sentsibilizatzeko.
Udalak adierazi zuen erabat ados dagoela proposamenekin, eta saiatuko dela ahal duen neurrian betetzen.
Proposamen guztiak ikusteko aukera, gaur, 10:00etatik 13:00era, Biterin.