Lehiaketa honetan, nola iritsi zarete finalista izatera?
UFItik jarri ziren gurekin harremanetan esanez, finalisten artean zegoela gure albuma. Euskerazko lanen artean batzuk aukeratu dituzte eta gurea da horietako bat. Sorpresa haundia izan da.
Finalisten artean daude, zuek baino ibilbide gehiagoko lau talde: Ken Zazpi, Urtz, Jabier Muguruza eta Oreka Tx. Zaila ikusten al duzue irabaztea?
Herritarrek eman behar dutenez botoa, gure ustez eragina izango du bakoitzak egindako publizitateak, hau da, zure inguruan zenbat zabaltzen duzun eta zenbat mugitzen zaren. Ibilbide gehiago duten taldeak dira eta jarraitzaile gehiago dituzte. Borroka horretan, txikiek talde haundien ondoan zailago dugu. Horregatik, gu saiatzen ari gara behintzat zabaltzen.
Sari hau irabaztea, zer izango litzateke zuentzat?
Beste sorpresa bat, ikusita ze talde diren finalistak... Eta noski, horrelako sari batek beti ematen dio taldeari prestigioa; lan gehiago izateko aukera. Horrelako sariak beti dira ongi-etorriak.
Astigartarrei bozkatzeko esango diegu orduan. Baina zergatik? Zer du Dambak?
Hasteko, bi neska, talde buru bezala (Estitxu Pinatxo da bigarrena). Gaur egun, oso talde gutxi daude Euskal Herrian bi neska buru dituztela. Eta bestetik, multikulturala da gure taldea. Toki guztietakoak gaude, eta bakoitzaren influentzia notatzen da. Mundu diferentetik gatoz eta estilo diferenteak gustatzen zaizkigu. Horrek denak, beste aberastasun bat ematen dio taldeari.
Azken lan honetan, euskeraz dira abesti guztiak, aurreneko diskoan ez bezala. Zergatik?
Orain arte kanpoan gehiago ibili gara eta orain Euskal Herrian gehiago mugitzeko asmotan gabiltza. Hala ere, zuzenekoan abestiak egokitu egiten ditugu gauden lekura. Abesti batzuk, hizkuntza batean baino gehiagotan ditugu eta toki bakoitzean dagokion hizkuntzatan abesten saiatzen gara.
Miren Amurizaren laguntza izan duzue letrak egiterakoan.
Bai, bereak dira. Ikuspuntu femeninoa nahi genuen, sentsibilitate femenino hori, eta berak goitik behera asmatu du. Oso oso gustora geratu gara. Mezu indartsuak, esanahi haundiko letrak dira.