Festa ederra bizitu zuten Hernaniko pelotazaleek joan den ostiralean, Hernanik Atauni irabazi eta aurrera egin baitzuen Gipuzkoako Herriarteko Txapelketan. Eliminatoriari buelta ematea lortu zuten hernaniarrek, Ataunen 2-1 galduta iritsi baitziren Hernanira. Kadeteek gutxi galduta, eta jubenilek eta nagusiek erraz irabazita, aurrera egin du Hernanik, eta hurrengo eliminatoria jokatuko du, ostiral honetan bertan, Hernanin, Oiartzunen kontra, iazko txapeldunaren kontra.
3-3 eta 15 tantoko aldea
Ataunen bi partidu galdu zituzten hernaniarrek, eta 9 tantoko aldea kendu zieten goierritarrek. Hernanik asko jokatu beharra zeukan ostiralean, eta halaxe egin zuen, egun haundietan bezala. Zaleek ere egun haundietan bezala erantzun zuten, eta festa izan zen frontoian. Hernanik 3-3 berdindu zuen kanporaketa, eta 15 tantoko aldea lortu.
Kadeteetan zeukan Ataunek bikote gogorrena. Hernaniarrak, Xabat Pagola eta Ander Lazkano, jakinda zenbat balio zuen tanto bakoitzak, gorputz eta arima saiatu ziren tanto bakoitzean, eta 9 tanto egin zizkieten ataundarrei.
Jubeniletan, Ekaitz Cisneros eta Suharri Rodriguez egurrera atera ziren, motibatuta, eta Ataungo partidu txarra ahaztu nahian. Nagusi izan ziren, eta 22-4 irabazi zieten Azkonobieta eta Zabalari.
Nagusiek irabazi eta 5 tanto baino gehiagoko aldea behar zuten. Ez zuten hutsik egin. Paul Ojuelek eta Markel Lizeagak beren maila erakutsi zuten. Erraz nagusitu ziren Arratibel eta Zalduaren kontra, eta 22-3ko emaitzarekin, Hernani final laurdenetara pasa zuten.
Berria txapelketan, jubenilek aurrera
Berria Txapelketako hiru partidu ere jokatu dira asteburuan Hernanin, eta Labak eta Erasun jubenilek aurrera egin dute, eta finalerdietan sartu dira, Markinari 22-7 irabazita.