Azken hilabeteetan behera egin dute odol estrakzioek Hernanin, eta odol emaileen elkartetik dei berezia egin diote jendeari, gaurko odol estrakzioetara animatzeko. Hileroko gisan, 18:30etatik aurrera, Anbulatorioan.
Hernanik datu onak ematen ditu; iaz 736 estrakzio izan ziren.
Estrakzioek %7 behera
Azken bost hilabeteko datuei begiratuta, %7 inguru jaitsi dira odol emateak. Urtarrilean oso ondo hasi zen odol ematea, 77 estrakziorekin, baina geroztik, batekoz beste, 50 estrakzio inguru izan dira hilero-hilero. Horren aurrean, Hernaniko odol emaileen elkarteak dei egin die hernaniarrei, ekainetik aurrera animatu daitezen.
Dena dela, odol emaileen elkartetik jakinarazi dute, badutela konfiantza jendea animatzeko. «Estrakzio gutxiago izan dira azken aldietan, baina pentsatzen dugu jendea hasiko dela animatzen». Hernani beti izan da odol emaile herria, eta datu onak ematen ditu. Iaz 736 estrakzio egin ziren Hernanin, eta OMSek proposatzen duen zifratik oso gertu. Aurten ere ea horra inguratzen diren hernaniarrak.