Pedro Grijalba Izagirreren familiak kalte ordainak eskatu ditu Pedroren heriotza Orbegozoko amiantoak eragin duela salatuta. Grijalba joan den ekainean hil zen, 58 urte zituela, minbizi bronkogeniko batek eraginda. Hernaniarrak mantenimendu mekaniko lanak egin zituen Pedro Orbegozo-Acenor enpresan, 1970 eta 1980 urte artean.
Ostegunean hasiko da epaiketa, eta familiak kalte ordainak eskatzen dizkio Sidenor-Gerdau enpresari, eragindako minaren ordain gisara.
Kontzentrazioa, Donostiako epaitegi aurrean
Heriotza salatzeko, eta familiari babesa adierazteko, kontzentrazioa egingo dute ostegunean bertan, 11:00etan, Donostiako epaitegi aurrean. ASVIAMIE elkarteak deitu du kontzentrazioa, Amiantoaren Biktimen Euskadiko Elkarteak.
ASVIAMIEk Kronikara bidalitako prentsa oharrean salatzen du, zenbat heriotza izaten ari diren amiantoak eraginda. Horrekin batera, Grijalbaren lankideak eta lagunak animatu dituzte kontzentraziora azaltzeko.
Gainera, amiantoarekin lanean aritu ziren guztiei jakinarazi diete komeni zaiela euren burua lan ondorengo Osasun Bijilantzia Planean sartzea, gaixotasunak behar bezain azkar harrapatu ahal izateko, eta izkutuan geratu ez daitezen.