Burgosen izango da partidua, bihar, 12:30etan San Amaroko zelaian. Zelai neutroan. Hil ala biziko borroka espero da. Izan ere, Madrilgo Complutense Cisneros taldeak ez dio erraz aldegiten utziko Ohorezko Mailari. Baina Hernani ere borrokarako prest joango da. Biharko partidua irabaziz gero, egindako denboraldi borobilari bukaerarik onena emango dio; Gorengo Mailara igotzea lortuko baitu.
Zaletuak animatzera joateko autobusa ere antolatu du klubak. Landaren bertan, eta Zintzarri tabernan jarri dituzte salgai txartelak, 5 eurotan. Autobusa, bihar aterako da Atsegindegitik, goizeko 09:30etan.
Euskal Ligatik, Ohorezko B Mailako txapeldun izatera
Sinistu ezineko denboraldia jokatu du Hernanik. Euskal Ligan hasi zen, urtero bezala, eta bertan, bigarren postua lortu du. Aurretik, Getxo besterik ez da gelditu; dagoeneko Ohorezko Mailan jokatzen duen taldea, alegia.
Hernanitik autobusa aterako da taldea animatzera joateko.
Denboraldi bikain horri esker, igoerako play offetan izan da Hernani. Lehengo asteburuan jokatu zen ligilla hori, Estatuko beste lau autonomiatako taldeen kontra, Leonen. «Ligilla jokatzea eta beste talde batzuk ezagutzea saria» zela zioten joan aurretik Hernaniko jokalariek. Ez zuten lorpen haundirik espero, «gainontzeko taldeak esperientzia eta bide luzeagoa duten taldeak direlako», eta hernaniarrek 3 urte besterik ez daramazkitelako jokatzen. Baina ezusteko galanta hartu zuten 4 partidutatik 3 irabazita. Horrek, Ohorezko B Mailako txapeldunen kopa Hernanira ekartzeko aukera eman die.
Urrezko ezteiak Gorengo Mailan ospatzeko ametsaren bila
Amets bat bizitzen ari dira, eta ametsak kunplitzen ari direla ikusita, horretan segiko dute hernaniarrek.
Cisnerosek ez du urte ona izan, baina historia eta esperientzia haundiko taldea da eta maila haundiko jokalariak ditu: Marina Bravo edo Lia Bailan, adibidez. Horregatik, borroka gogorra izango da.
Hernaniko klubak, ordea, datorren urtean 50 urte beteko ditu, eta bi taldeak Gorengo Mailan dituela ospatzeko borrokatuko du.