Garagardo festa baina gehiago, errugbiaren festa izaten da Hernanin Garagardo Azoka. Atzo zabaldu zituen ateak, omenaldi txiki batekin. Errugbiko neskak goraipatu zituzten, igandeko partidurako animoak eman, eta egiten ari diren denboraldia zoriontzeko. Amets, kapitainak azaldu zuen Ohorezko B Mailako Kopa izan dela «etorriko diren sarietan lehenengoa». Bestalde, Onintza eta Martak jokatzeari utziko diotela azaldu zuten. Azokak iluntzeko 19:00etan zabaldu zituen ateak, eta gauerdian itxi. Gaur ordutegi bera izango du.
Asteburuan aukera zabalagoa izango da. Azoka eguerdiko 12:00etatik aurrera egongo da zabalik, eta jateko aukera izango da 13:00etatik 16:00etara, eta 19:00etatik aurrera. Garagardo aukera zabala jarri dute aurten ere: hamabi ezberdin. Jateko, ohiko jakiak: ukondoa, saltxitxak, oilaskoa, patata purea...
Erlazioa sendotzeko aukera
Urtean zehar bakoitzak bere lekua izaten du: jokalariek zelaian, eta afizio eta herritarrak animatzen. Garagardo azoka aitzakia perfektua izaten da hartuemana izateko.