«Pena haundiarekin» gelditu dela dio Arkaitz Etxarri hernaniarrak, berak eta Lixto txakurrak ez baitute lortu Basurdeetako Arrasto Txakurren Espainiako Txapelketarako sailkatzea. Baina izango dute nolabait arantzatxoa kentzeko aukera; asteburu honetan jokatuko den Nafarroako Kopan eta ekainaren 21 eta 22an jokatuko den Gipuzkoako Kopan.
Hala ere, ikaragarrizko denboraldia egin dute biek, orain arteko sailkapen guztietan lehenengo postua lortuta.
Nafarroa, Gipuzkoa eta Arabako txapeldunak
Nafarroan hasi zuten denboraldia Etxarri eta Lixtok, apirilaren 26an; Elizondon. Nafarroako txapela nafarren artean jokatu zen, baina aldi berean jokatu zen txapelketa orokorra; hor, lehenengo postua lortu zuten.
Maiatzaren 1ean, berriz, Berastegin izan ziren, eta bertan, direnak eta ez direnak irabazi zituzten! Gipuzkoako txapela batetik, eta txapelketa orokorra, bestetik.
Azkenik, Araban izan ziren maiatzaren 3an, Izarran, eta han ere sailkapen orokorreko lehenengo postua lortu zuten.
«Lixto ehizerako txakurra da berez, baina ederki daki nora eta zertara dijoan: koilaretik helduta ehizera, eta arnesetik, txapelketara».
Euskadikoan, «egun txarra»
Euskadiko Txapelketa, berriz, Orduñan jokatu da, pasa den igandean. Bosna arabar eta bizkaitar, eta zazpi gipuzkoar aritu dira lehian; tartean, noski, Etxarri eta Lixto. Joan aurretik, «aurreneko 4en artean sailkatzea» zuen buruan Arkaitz Etxarrik, 4-5 pasatzen baitira txapelketa nazionalera, eta «helburua txapelketa nazionalera pasatzea» baitzen.
«Bizkaian badira bi-hiru fuerte xamar dabiltzanak; Araban ere bada baten bat; eta Gipuzkoan, beste pare bat. Baina Lixto oso erregularra da eta gutxitan egiten du kale. 4 urte egingo ditu txapelketatan, eta lehenengo urtetik hona asko asentatu da. Nik ere ikasi egin dut; lasaiago egoten naiz, eta txakurra eta bion hartu-emana hobea da. Detaile txikiekin ere erantzun egiten dit», zioen joan aurretik. Baina, azkenean, ezin.
«Lixto gaizki ibili da. Zorte txarra izan dugu, eta pena haundiarekin gelditu naiz. Txakurra orain oso ondo dago, baina! Hurrengo urtera arte itxoin beharko dugu!».
«Zorte txarra izan dugu, eta pena haundiarekin gelditu naiz. Txakurra orain oso ondo dago, baina! Hurrengo urtera arte itxoin beharko dugu!».
Urtez urte, maila gora
Azken helburua lortu ez badu ere, Arkaitz Etxarri pozik dago orain arteko emaitzekin. Ez bakarrik txapelketakoekin; baita antolakuntzaren aldekoekin ere. Izan ere, 3 urte besterik ez dira Euskal Herrian ere Federazioarekin txapelketa antolatzen hasi zela, eta parte-hartzaile kopurua asko hazi dela ikusi du.
«Kantabrian edota Burgosen, adibidez, maila altua da, ohitura baitute. Baina hemen orain dela 3 urte hasi ginen Federazioarekin txapelketa hauek antolatzen, eta arrakasta izan dute! Gipuzkoakoan 41 parte-hartzaile izan ginen, le-hengo urtean baino bi aldiz gehiago, eta Arabakoan ere asko elkartu ginen: kantabriarrak, burgostarrak, nafarrak, arabarrak, bizkaitarrak, baina Gipuzkoatik ni bakarrik!».
Beste pausu bat eman nahi du orain. «Basurde batzuk legalizatzea nahi dugu, entrenatu ahal izateko. Beste toki batzuetan horrela egiten da».
Lixto, denetarako txakurra
«Txakurraren abilidadea garrantzitsua da; baita zortea ere! Baina erakutsi ere egin behar zaio; denbora dedikatu». Horixe egin du Etxarrik Lixtorekin. «Txapelketetarako mendira joan izan gara astean pare batetan, arratsaldez, aurreko gaueko arrasto bila. Bestela, ehizerako txakurra da. Batzuek txapelketatarako bakarrik erabiltzen dituzte. Baina honek ederki daki nora eta zertara dijoan: koilaretik helduta ehizera, eta arnesetik, txapelketara».
Lana eskatzen duela-eta, Arkaitz Etxarrik ez dauka Lixto inolaz ere ordezkatzeko asmorik. Ederki ibili dira, eta datorren urtean izango dute aukera aurtengo helburua lortzeko.