Asko desiratzen diren ametsak egi bihurtzeko arriskua izaten dute eta Eibar futbol taldeari hala gertatu zaio. Denboraldia bukatzeko bi partiduren faltan lortu dute hainbeste amestutako igoera. Igandetik Aurreneko Mailako taldea da Eibar. Gorka Kijera hernaniarrak bertan jokatzen du, eta Kronikari aitortu dionez, sinistu ezinda daude oraindik: «lortu duguna gauza haundia da, laino batean gaude, asimilatzea kostatzen ari zaigu... baina denbora kontua da, Lehenengo mailako taldea gara».
Azkeneko momentura arte, zain
Igandeko jardunaldia hasi aurretik bazekiten igoera egun horretan gauzatu zitekeela. Emaitzetako bat, Murcia eta Zaragozaren artekoa, aldeko zuten. Beraiek ere, egin beharreko lanak egin, eta 1-0 irabazi zuten Alavesen kontra. Las Palmas eta Recreativoren arteko emaitza falta zen: «aldagelan sartu ginen, irratia piztu eta partidua internetez ikusi genuen. Recrek irabazi behar zuen, baina Las Palmas aurreratu zen 2-0. Datorren asteburura itxaron beharko genuela sinistuta geunden. Baina Recrek 2-1ekoa sartu zuen, eta 2-2koa; eta 3-3koa! Bost minuturen faltan konturatu ginen igotzeko aukera asko genituela. Hura antsietatea. Bizitzan behin gertatzen den zerbait da, ez dut hitzik sentitu nuena deskribatzeko. Amets bat bezala bizitu genuen».
«Etorkizuna Primeran ikusten dut»
Urtebetetzeko opari ederra jaso zuen igande gauerdian Kijerak. Kronikari aitortu dionez, festa ordu txikietaraino luzatu zitzaien. Ospakizun ofiziala larunbatean dute: Eibargo Udalean harrera eta Arrateko basilikara bisita.
Kirol arloan, Eibarrek bete ditu helburuak. Legeak dio ordea, kapital zabalkuntza egin behar duela klubak; bestela, 2B mailara jaitsiko lirateke. Kijerak esperantza baduela dio, eta datorren urtean Primeran ariko direla.
Bere etorkizunari dagokionean, kontratua du, eta itxaropentsu dago: «badakit jende berri asko etorriko dela. Nik kontratua dut, eta Primerako taldearen parte izango naiz. Orain gogor entrenatu behar dut».