Autobusak antolatu ditu Hernaniko Preso eta Iheslarien kolektiboak datorren larunbatean 12:30etan Ondarruko Alamedatik aterako den manifestaziora joateko. Txartelak Garin eta Oinddin jarri dituzte salgai. Manifestaziora joateko dei egin dute.
Kolektiboak salatu du Hernaniko bi euskal preso daudela larri gaixo dauden 12 presoen artean. Ibon Fernandezek esklerosi anitza dauka, eta Gari Arruartek espondilitisa; bi gaitzak degeneratiboak dira. Kolektiboak dio «gaixo egonda ere neurririk krudelenak aplikatzen dizkietela kartzeletan». Horregatik diote «giza eskubideak, konponbidea eta bakearen bidean eskubide urraketa guztiak gainditu eta muturreko egoera hauekin amaitzeko lanean herritarrak inplikatzea ezinbestekoa» dela.