Portu eta Karabel auzoa lotzen dituen bidea obretan egon da azken hilabeetan. Oinezkoentzako bidea egin dute, eta aldamenean, bidegorria jarri ere bai. Portuko Lonja etxearen bueltan bat egiten dute bide guztiek: ibilgailuak dabiltzan errepideak, oinezkoek, txirrindulariek... Soluzio gisa, gune gorria jarri dute bertan. Gune gorria gainontzeko errepidea baino zentimetro batzuk altuagoa da, eta eremua ondo arautzen duen seinaleak jarri dituzte aldamenean.
«Arazoak, bi konkorrak jarri dituztenetik»
Obra bukatzeko azken lanen parte izan da, baden edo bi konkor gehitzea, zona gorri horren hasierari. Bat Portuko erriberetara sartzeko zubiaren inguruan jarri dute eta bestea Indianoe baserriaren aldemenean. Herritarren kexak bi konkor horien harira etorri dira. Diote, batetik, ez zegoela konkor beharrik: «izan ere, eremu gorria bera errepidea baino zentimetro batzuk altuagoa da, eta hortaz, koskaren funtzio hori betetzen du. Bestetik, nahikoa seinale badagoela uste dugu, eremu horretako abiadura eta baldintza bereziak azaltzen dituena. Eta bukatzeko, koskaren altuera gehiegizkoa da. Frenatu bakarrik, ez aurreneko martxa jarri eta suabe pasatzen hasita ere, azpiak ikutzerainoko saltoa ematen du kotxeak». Bestalde, gogoratu dute 5 koska daudela 200 metroko eremuan.
Gomazkoak jartzeko eskaera
Osiñaga auzoko bizilagunak auzoan barrena dituzten konkorrekin ere kexu dira. Diote, herrira joan-etorria egunean 4 alditan egin behar izaten dutela askok, eta herrigunera iritsi bitartean 10-12 koska artean pasa behar izaten dituztela: «auzoan zehar jarrita dauden konkor kopurua berraztertu egin beharko litzakeela uste dugu. Gainera, herrigunetik urruntzen diren auzoetan, gurea kasu, hormigoizko konkorrak jartzen dira eta ez dakigu zein den auzo batzuen eta besteen arteko diferentzia, hori horrela izateko. Berraztertu eta mantendu behar diren konkorrak gomazkoak izatea eskatzen dugu»
Eskaera eginda
Auzotarrek zein herritarrek eskaerak Udalera bideratu dituztela azaldu diote Kronikari, eta orain zain daudela.