Xabier Ezeizabarrena Txirrita kaleko batzokian izan zen ostegunean. Gipuzkoako ordezkaria izango da Europako Hauteskundeetan, eta dituen asmoak azaldu eta herritarren kexa eta beharrak entzuteko gogoz etorri zen. Hernaniko EAJ alderdiak hitzaldiak antolatzeko pausua eman du azken asteetan, eta horren harira izan da Ezeizabarrena Hernanin. Andoni Amonarraizen esanetan, asmoa da instituzio ezberdinetan kargua duten politikariek eta herritarrek elkar ezagutu eta iritziak elkarbanatzea.
«Agirre Lehendakariak eta inguruko politikoek aktiboki hartu zuten parte Europar Batasunaren proiektuan».
«Politika egiteko bidea hau da»
Batzarkide, parlamentari, senadore, sailburu edo bestelako karguren bat duten politikariak Hernanira ekartzea da EAJren helburua: «politika egiteko bidea hori dela uste dugu; herritarrek esateko dutena entzuna izatea nahi dute. Eta bestalde, politikariek egiten duten lana eta dituzten asmoak azaltzeko aukera izaten dute».
«Herritarrak geroz eta gehiago gerturatzen dira politikoengana»
Ostegunean Xabier Ezeizabarrenarekin elkartu ziren herritarrek egindako galderen artean zeuden: atez atekoaren etorkizuna, herritarren partehartzea, langabezia eta gizarte zerbitzuak. Hernaniko EAJk dio, jendea geroz eta gehiago gerturatzen dela politikoengana: «konturatu gara jendea beldurra galtzen ari dela, eta hori oso positibo baloratu behar da; esperientzia aberasgarria da guztiontzat».
«Euskadin jaio eta Europako sorreran hasieratik parte hartu duten alderdien ahotsa entzun behar da Europako Parlamentuan».
«Europan hartzen diren erabakiek eragina dute»
Ezeizabarrenak emandako azalpenen inguruan, bi ondorio garbi atera daitezkeela dio EAJk: «batetik azpimarratu, 1950 urtean Agirre Lehendakariak eta honen inguruko politikariek aktiboki hartzen zutela parte Europar Batasunaren inguruko proiektuan. EAJ alderdiarentzat Europa beti izan da herrien proiektu bat, estatuen proiektu bat baino gehiago. Eta bestetik gogoratu,
Ezeizabarrenak Europan hartzen diren erabakiei emandako garrantzia. Honen esanetan, bertan erabakitzen denak eragin zuzena du herritarren eguneroko bizitzan».
Euskadin sortutako alderdien ahotsa entzun behar da Europan
Azken gogoeta gisa, EAJk dio, Euskadik, Estatu gabeko herria izaki, ahots bat behar duela Europan: «Euskadin jaiotako alderdien ahotsa entzun behar da, Europako sorreran hasieratik parte hartu duten alderdien ahotsa»