Maiatzaren 31n bertso-afaria egingo da Osiñaga auzoan, Arriatsuko eskolan. Auzoko festen preludio moduan antolatu dute, eta auzotar guztiei animatzeko deia luzatu diete antolatzaileek. 21:30ak inguruan hasiko da afaria, eta segidan, Gartxotekin kantuan aritzeko aukera izango da. Izena emateko epea maiatzaren 29an bukatuko da: 636 253 981.
«Kantu-afariak desberdinak dira, jendeak nerekin abesten du»
Gartxotek 20 urte daramazki kantuan, bai kontzertuak ematen eta baita kantu-afarietan parte hartzen ere. Urtebete darama Osiñaga auzoan bizitzen, eta pozik dago gonbidapenarekin. «Ilusioa egiten du auzotarrak nerekin gogoratzeak. Lehendabiziko aldia izango da hemen jotzen dudala, eta aukera izango dut auzotarrak ezagutzeko».
Kantu-afariak «desberdinak» direla dio Gartxotek, «jendeak nerekin kantatzen du. Normalean, 3 L-ak izaten dira oinarria: Lete, Lertxundi eta Laboa. Baina denen artean prestatuko dugu emanaldia. Askotan, auzotarrei ere eskatzen diet bertako bertso zaharren bat-edo, kantatzeko. Beti ez da egoten, baina ea baten bat gogoratzen den!».