Bost egunetan oinarrizko ikastaroa emango dute Biterin, zaintzaileentzat. Zehatzago esanda, ikastaroa eskaintzen zaie adinekoen zaintzaileei. Adinekoek bakarrik moldatu ezin dutenean, zaintzaleren bat izaten dute, askotan etxekoa. Zaintzaile horiek beraiek arazoak izan ditzakete, hainbat gauza kontuan hartzen ez dituztelako. Kontu horiei buruz ariko dira ikastaroan, Hernaniko Ongintza Patronatuak antolatuta, Sendian programaren barruan.
Maiatzean bi, ekainean hiru
Ikastaroak bost saio izango ditu, maiatzean bi eta ekainean hiru. Bihar bertan izango da lehendabizikoa, eta hurrengoak: maiatzak 27, eta ekainak 3, 10, 18. Biterin izango dira, eta ordu berean: 15:00etatik 17:00etara.
Silvia Camiok emango du ikastaroa, eta bost saiotan hainbat gairi buruz ariko da: zaintzaileak bere burua nola zaindu, erlajazio teknikak, komunikazio teknikak... edo genero rolak eta aurreiritziak, zaintza eskubide gisara, familia barruko negoziazioa, lanak besteri uzten ikastea... eta hainbat kontu gehiago izango dituzte hitz egiteko, oinarrizko ikastaro honetan.
Apuntatu nahi duenak, telefono honetara deitu behar du: 943 55 78 54.