Oiartzunen urtero jokatzen da Euskal Herriko Txapelketa, inguruko txapelketa herrikoietan garrantzitsuena, eta aurten, bi hernaniarren izenak daude azpimarratuta: Endika Ramos eta Aiheko Zubimendi. Larralde eta Zumeta beteranoei 25-23 irabazi zieten Ramosek eta Zubimendik, inork askok espero ez zutela, ezta beraiek ere. Bi ordutik gorako finalean, elkar lehertu ezinda ibili ziren lau pelotariak. Faboritoak, zaharrak; jendea gazteen alde. Tanto bakoitzean txalo zaparradak... Gogoan hartzeko finala irabazi zuten, eta beraiek dira paleta goma modalitatean 1go mailako txapeldun. Ondo merezita.
Iaz bigarren mailakoa irabazi
Bigarren mailako txapela jantzi zuten iaz, eta aurten ez zuten espero partidu bakar bat irabazterik, 1go mailan. «Gaizki hasi genituen lehenengo partiduak, gainera, baina irabazi, eta irabazi... eta finalerdiak irabazi... eta elkarri esaten genion, hau zer da, amets bat?», dio Zubimendik. Ez dira asko izango Oiartzunen bi urtetan bi mailatako txapelak jantzi dituztenak, eta Zubimendiren kasuan oraindik azpimarratzekoagoa, orain dela bi urte hirugarren mailakoa irabazi baitzuen, Iradirekin.
Indarrean da bikote hau, eta hainbat txapelketa dituzte orain, jokoan: Idiazabal, Tiloseta, Loiola, Irun... eta datorren urtean federatuta ere jokatuko dute. Ez daude gaizki, orain arteko martxari segiz gero.