Urtero 7 txapelketa inguru jokatzen dituzte Hernaniko palistek. Tartean, GRAVNI Txapelketa garrantzitsua. Aurten, Goiatz Manzisidorrek eskuratu du txapela, ezker pareta edo frontoian, Maider Mendizabal Su Berri klubeko palistarekin bikotea osatuta. Hirugarren aldia da Manzisidorrek txapel hau lortzen duela.
Orain, denboraldia ia bukatuta, deskantsatzeko denbora hartuko du udaran. Datorren urteari begira, indarrak hartuko ditu, «trinketean txapelen bat eskuratzeak ilusioa» egingo liokeela eta, helburu hori lortzeko.
GRAVNI Txapelketako ezker paretako txapela irabazita, pozik? Asko kostatakoa izan al da?
Finalerdira iristeko ekipoa begenuen. Baina hori irabaztea kosta egin zitzaigun! Nafarren kontra aritzea tokatu zitzaigun, eta dudarik gabe, beraiek ziren faborito. Bikote zailena beraiena zen. Kontua da atzelariak ez duela txapelketa osoa jokatu, min hartuta eta, egon delako. Hala ere, juxtu-juxtu irabazi genuen, 30-28, eta ia partidu osoa atzetik ibilita.
Finalean, berriz, arabarren kontra aritu ginen, eta kasu honetan, hobeto. Nafarren ondoren, gipuzkoarrak ginen txapelketako faborito, eta finalean aurretik ibili ginen denbora guztian. 30-23 irabazi genuen.
Aurten lehenengo aldiz Iparraldea ere sartu da txapelketan. Horrek lana zaildu al dizue?
Frontoiean ez dira sartu, trinketean aritu dira, eta eskerrak! Dudarik gabe, beraiek ziren faborito, eta ia dena irabazi dute: jubeniletan eta sub22 mailan nagusi izan dira, eta seniorretan ez dute irabazi, baina kasualitatez! Jubeniletan Maider Huizi eta Ariane Arrieta hernaniarrei irabazi zieten, eta sub22an, Miren Goikoetxea eta Amaia Irazustabarrenari.
Maila ona dago Hernanin, eta etorkizuna ziurtatuta!
Orain gazte asko dago bai. Egon zen batxe bat, baina orain jende asko dago. Amaia Irazustabarrenaren adinaren bueltan, 20, 19 edo 18 urteko neskak badaude, oso ondo jolasten dutenak. Kadeteetan ere entrenatzen ibili, ibiltzen dira. Zein mailatan ez dakit, baina ibiltzen dira: Huizi, Arrieta... oso ondo ibiltzen dira. Gure garaian jende gutxiago ginen. Garbiñe Tijerok nolabait altxa du taldea. Kaña sartu du! Izan ere, palan jokatzeko afizioa eta maila behar dituzu; dena galduz gero, desanimatu egiten zara. Gustatu ere egin behar zaizu: astebururo partiduak, kanpora ikastera joanez gero entrenatzeko zailtasunak... Adin bat ere izaten da parrandak nahiago dituzuna... Ni 7 urte inguru nituela hasi nintzen; 14-15 urterekin federatu, eta orain 33 ditut! Txapelketa eta partidu asko... Hala ere, aurten lasaiago hartu dut urtea. Gazteagoa zarenean gustora aritzen zara, baina orain!
Urte hauetan guztietan irabazitako txapelen artean, baduzu faboritorik?
Ilusio haundiena egin zidanetako bat izan zen frontoian Euskal Herrikoa irabazi nuenekoa. Amaia Martinezekin jokatu nuen orduan, eta oraingo bikotearen kontra, Maider Mendizabalen kontra irabazi genuen.
Bikoteak askotan aldatzen dituzue?
Maiderrekin ez dut urtean zehar jokatzen, bera Su Berrikoa delako. Hernaniko klubean ere nahastuta ibiltzen gara, frontoian, trinketean, eta partidu bakoitzean batekin edo bestearekin. Bat kanpoan dagoela, besteak egun horretan ezin duela jokatu... Ez gara honetaz bizi! Gero, Emakume Pilotari txapelketan, adibidez, klub guztiak nahastuta jokatzen dugu, batere entrenatu gabe, eta txapelketak aurrera egin ahala moldatzen joaten gara. Oraintxe hasiko da txapelketa hau eta Euskal Herriko trinketean Hernaniko talde bat atera da, eta moldatu daiteke. Ez dakit zehazki zein aterako diren, baina gerra emango dute!
Eta Goiatz Manzisidorrek, zein helburu ditu?
Trinketean txapelen bat irabaztea ondo legoke. Aurten Gipuzkoako finalean egon ginen, baina ez genuen egun onena izan. Datorren urtean horixe eskuratu nahiko nuke, eta behin jarrita, Euskadikoa irabaztea ikaragarria litzateke!
Trinketea ala frontoia nahiago?
Frontoia da jo eta jo eta jo. Trinketeak beste xarma bat du neretzat, nahiago dut. Posizioa, berriz, frontoian aurrelari nahiago, baina trinketean ez! Azkarregi etortzen da pelota!