Urtero bezala, herriko baserritarrak omentzeko, festa antolatu zuen Goldeak ostegunean, San Isidro egunean. Giro ederrean joan zen, eguraldia lagun, eta errekor berri bat ere lortu zen idi deman. Bizkaiko Iñigo Aurrekoetxearen idi pareak 42 plaza eta 2 zinta egitea lortu zuen, harri haundiarekin, hau da, 3.200 kiloko harriarekin. Orain arteko marka 39 plazatan zegoen, Erandioko Josu Arteagoitiaren idi pareek egina. Ostegunean, Kantabriako Antonio Cotareloren idi pareak ere izan ziren lehian, baina ezin. 36 plaza egin zituzten.
110 lagun bazkaltzen
Urtero baserritar zaharrenak omentzen ditu Goldeak eta oraingoan, Mari Karmen Ostolaza eta Joxe Mari Imaz senar-emaztek izan dira omenduak. Bazkarian jaso zituzten oroigarriak. Denera, 110 lagun elkartu ziren. Andoni Egaña eta Sebastian Lizaso bertsolariak ere bertan aritu ziren giroa alaitzen. Aurretik, trikitixa, prozesioa, barazki erakusketa, hamaiketakoa eta idi proba izan ziren.