Mendialdea Mankomunitateak sentsibilizazio kanpaina bat dauka martxan, konpostajea bultzatzeko, eta Joseba Sanchez Vermicaneko teknikariak hitzaldi informatiboa eman zuen
Aranon, aurreko astean.
Aranon, organikoa eta errefusa batera biltzen dira kontenedore berdean. Eta Europako legeari jarraituz, lan asko dagoela egiteko azaldu zuen Sanchezek. Organikoarekin lotuta, Aranorentzat egokiena, konposta egitea litzatekeela nabarmendu zuen. Honako datuen berri eman zuen: «121 biztanle daude erroldatuta Aranon eta denera, 85 etxebizitza daude. Etxebizitza gehienak familia bakarrekoak dira, konpostagailua jartzeko egokiak. Urtean, Aranon, 11-12 tona hondakin organiko biltzen dira. Hauek, kontenedore berdean jasotzen den %45a osatzen dute. Aranora hondakina biltzera joateko kilometro asko egin behar dira eta hondakin organikoa herrian bertan kudeatuko balitz (konpostajearen bidez), arazoaren zati haundi batekin bukatuko litzateke, eta merkeagoa litzateke. Udalerrian sortzen den organiko guztia konpostatzeko, nahikoa izango litzateke etxeko konpostagailuak banatzea eta 2-3 auzoko konpostagune jatzea. Onura guzti hauetaz aparte, kalitate haundiko ongarri organikoa lortuko litzateke, udalerrian bertan erabiltzeko».
Konpostajearen uste okerrei buruz ere aritu zen Vermicaneko teknikaria eta oso erraza dela azpimarratu zuen.
Mendialdera edo Udalera deitu
Konpostadorak Mendialdea Mankomunitateak jarriko ditu eta horretarako herritarrek eskaera egin behar dute. Mendialdera (948 51 04 44) deitu dezakete edo Udalera (948 51 40 45). Udaletik jakinarazi dute, ahalegina egingo dela konposta zer den ahalik eta ondoen azaltzeko eta informazio argia emateko. Edozein zalantza izanez gero, bertara deitzeko eskatu dute.