Bertako ilarra bultzatzeko, hainbat ekintza antolatu ditu Baratz elkarteak egun hauetan. Gaur, esaterako, bisita gidatuak antolatu ditu baratzeetara (10:00-13:00). Eliza atzeko baratzatik abiatuko dira bisitak. Bertan, 8 mota ilar jarri dituzte: Maravilla, Principe Alberto, Rondo, Lincoln, Kelvedon, Precovil, Dulce Provence, eta Roi de conserves.
Euskal produktuen azoka
Egun nagusia bihar izango da eta aurreko urteetan bezala, azoka antolatu dute. Euskal produktuez osatutako 20 postu jarriko dira Foru plazan (10:00-14:00). Jokuak ere egongo dira.
Ilar sukaldaritza lehiaketa
Herritarrek sukaldaritzan duten abilezia erakusteko aukera ere izango dute bihar. Ilar sukaldaritza lehiaketa antolatu dute (10:00-11:00). Binaka hartu behar da parte. Osagaiak eta sukalderako material guztia antolatzaileek jarriko dute. Osagaiak: 1/2 kilo ilar (aletu gabe), 200 cl oliba olio, gatza, ura, 100 g hirugiharra, tipula 1, baratxuri freskoa eta 2 arrautza. Izena emateko: 943 33 50 72/943 33 50 64 edo baratzelkartea@gmail.com.
Hernaniko Musika Bandaren emanaldia, bihar
Musika ere izango da bihar azoka girotzeko. Izan ere, Hernaniko Musika Bandak emanaldia eskainiko du, Foru plazan. Eguerdi partean ariko dira, 13:00etatik aurrera. Udalak antolatu du kontzertu hau eta Baratz elkartekoek gustora hartu dute ekimen hau.