Loreak eta landareak maite dituztenek 10 postu dotore aukeran izango dituzte larunbatean, Urbieta kalean. Landare eta lore azoka berezia Donostialdeako herrietan dabil, eta larunbatean Hernanin izango da, 09:00etatik 14:00etara.
Behemendik eta Landare Azoka taldeak antolatu dute, Hernaniko Udalaren laguntzarekin, eta atzo aurkeztu zuten Nere Borda parke botanikoan. Bertan zen Hernaniko Mendi Lore denda ere, azoka honetan parte hartuko baitu, hain justu.
Aukera: landareak, zuhaixkak, dekorazio loreak, orkideak, lore lehorrak, hazi ekologikoak, jateko loreak, bonsaiak, kaktusak...
Denek azpimarratu zuten azoka tematiko hauek aukera polita direla zuzenean saldu ahal izateko, eta produktoreak ezagutzeko.
85 metroko ‘lorategia’
Behemendik bultzatzen du azoka hau eta Gipuzkoako landare produzitzaileak elkartzen ditu. Elkarren konpetentzia izan gabe, elkarrekin lore aukera zabal bat osatzen dute, 85 m2-ko lorategi bat kalean. Aukera ederra izango da: landareak, zuhaixkak, dekorazio loreak, lore lehorrak, hazi ekologikoak, jateko loreak, medikuntza naturala... Horri, herri guztietan bertako denda bat elkartzen zaio. Hernaniko kasuan, Mendi Lorek parte hartuko du, eta orkidea aukera zabal bat eramango du.
Umeentzako tailerrak eta jolasak ere izango dira.