Baratz elkarteak Ilarraren Eguna antolatu du hirugarren urtez, Udalaren laguntzarekin, besteak beste. Astelehenean aurkeztu zuten prentsaurrean. Bihartik igandera bitarte, ekintza desberdinak izango dira Astigarragako ilarra bultzatzeko, eta ahal bada, sagardoaren pare jartzeko. Andoni Gartzia alkateak eta Charo Zapiain Baratz elkarteko presidenteak baserritarren lana eskertu eta goraipatu zuten. «Gipuzkoako sukaldaritza oso maitea da. Elikagai oso onak erabili izan ditugulako da hori; horrek asko laguntzen dio sukaldariari», nabarmendu zuen Zapiainek. Ilarrarekin hasi dira, baina aire libreko baratzen defentsan lan egitea da elkartearen helburua. Hilario Arbelaitz (Zuberoa jatetxea) eta Sonia Tapia (Fronton jatetxea) ere aurkezpenean izan ziren. Baserritarrekin zuzenean lan egiteak duen garrantzia azpimarratu zuten eta baita bertako ilarraren kalitatea ere: «Kanpoko sukaldariak harrituta geratzen dira bertako ilarraren fintasunarekin».
Bihar hasiko dira ekintzak, pintxo-potearekin. Igandean, azokaz gain, sukaldaritza lehiaketa antolatu dute.
EGITARAUA - Ilar Eguna
Bihar, osteguna
19:00 Pintxo-Potea: Ilarrarekin
egindako pintxoak, Astigarragako Tabernetan. Lehiaketa izango da eta puntuak emateko txartelak egongo dira. Irabazlea, igandean jakingo da.
Ostirala
19:00 Forum irekia: ‘Baratzetik
koilarara’. Kultur etxean. Ilar kalitatearen inguruan hitz egingo dute, ekoizle, baserritar eta sukaldariek. Bezeroek zer nahi izaten duten
jakiteko interesgarria.
20:00 Ilar menua,
Astigarragako jatetxeetan.
Larunbata
10:00-13:00, Astigarragako
baratzen bisita, ilar biltze eta
aletzea. Eliza atzetik abiatuta.
Igandea
Foru plazan:
10:00-11:00 Ilar sukaldaritza
lehiaketa, bikoteka.*
10:00-14:00 Ilarra Azoka berezia: Euskal Herriko produktuak.
Jokuak eta familientzako jarduerak.
Sukaldaritza erakustaldia eta lehiaketa. Ilar dastaketa eta Hernaniko Musika Bandaren Kontzertua.
*Parte hartzeko, kultur etxean apuntatu: 943 33 50 72/943 33 50 64 edo baratzelkartea@gmail.com.