Oso fin ibili zen atzokoan Hernani Sevillako Ciencias-Cajasolen aurka. Arnasa hartzeko beharrezkoa zuen garaipena lortu zuen, eta garaipen soila ez, bost puntuak etxean gelditzea ere lortu zuen. Markagailuan aurretik izan ziren partiduaren hasiera-hasieratik, eta alde nabarmena atera zieten sevillarrei.
Maila mantentzeko helburuari begira, pausu haundia izan zen atzokoa, eta hemendik aurrera jokatu beharreko partiduak gogorrak izango badira ere, beste animo batzuekin hartuko dituzte, inoiz baino indar haundiagoarekin.
Talde osoaren lana
Primeran ibili ziren atzo etxeko jokalariak, eta taldean egin zuten lana. Puntuak lortzeko ere, denek jarri zuten zeukaten guztia. Otegik egin zuen lehenengo entsegua, eta Genuak transformatu. Sevillarrek berehala txikitu zuten aldea zigor kolpe baten bidez, baina hernaniarrek bi entsegu gehiago egin zituzten 15garren minuturako, eta 24garrenean aldea are gehiago haunditu zuen Mattin Mujikak. Cienciasek erreakzionatu egin zuen, baina atsedenaldiaren atarian Igor Etxeberriak 29-8 jarri zuen partidua. Bigarren zatian lasai aritu ziren, bonusa eta garaipena dagoeneko poltsikoan zituztela. Entsegu bana egin zuten bi taldeek, baina emaitza erabakita zegoen.