Atzo inauguratu zen Ekoguneko Baratza Parkea. Mikel Insausti (Kutxa Ekoguneko zuzendaria), Carlos Ruiz (Kutxa Gizarte Ekintzako zuzendaria) eta Anabel Ruizek (baratzekideen ordezkaria) egin zituz-ten aurkezpenak, eta ondoren, bertaratutako guztiek instalazioak ezagutzeko aukera izan zuten.
Baratza Parkearen inguruan «komunitate bat» sortu dela nabarmendu zuten, ekologia, jasangarritasuna eta talde desberdinen topaleku delako.
7 udalerri eta 600 baratzakide
Oriamendira bidean dagoen Ekoguneko Baratza Parkea Gipuzkoako 7 udalerrik osatzen duten Sareko parte da. Horren erakusgarri, herri bakoitzeko ordezkariek sagarrondo bat landatu zuten atzo.
Hernani, Usurbil, Lezo, Zegama, Errenteria, Tolosa eta Alegi dira herri horiek. Guztira, 600 herritar inguru dira baratza hauetako erabiltzaile edo baratzakide, eta atzo irekitakoetan Hernani, Lasarte eta Donostiakoek hartzen dute parte. Dagoeneko hasi daitezke banatu diren 160 lursailak lantzen.
Baratza Eskola
Hiru helburu ditu Baratza Parkeak: elikadura osasuntsua bultzatzea autokontsumoaren bidez, nekazaritza eta ongarri ekologikoak bultzatzea eta talde eta belaunaldi desberdinen topaleku izatea.
Horretarako, lurra lantzeaz gain, konposta egingo da bertan, eta talde eta eskolek lurra lantzearen inguruko xehetasunak ikasteko aukera izango dute.