Egun seinalatua zen atzokoa hernaniarrentzat, 10 urte bete baitziren Kontxi Sanchiz hernaniarra hil zela, ertzaintzaren karga baten erdian. Gertaera nola izan zen bertsio ezberdinak izan ziren orduko hartan. Familiak salaketa jarri zuen Donostiako Epaitegian, eta salatzen du, oraindik gertaera hark argitu gabe jarraitzen duela.
«Ertzain bati laguntza eskatu nion, eta hark erantzun zidan: ‘neri bost axola’»
Egun bat lehenago, martxoaren 13an, Iruñean Angel Berroeta hil zuten, polizia batek eta haren semeak. Egun bat beranduago, heriotza hura salatzeko, manifestazioa egin zen Hernanin, eta 400 bat lagun bildu ziren. Puntu batean Ertzaintzak geratu egin zuen manifestazioa, pankartako hainbat kide identifikatzeko. Tentsio momentuak sortu ziren, eta manifestazioak aurrera egin zuen arren, ertzaintzak kargatu egin zuen. Nagore Gonzalezek, Kontxi Sanchizen alabak, horrela gogoratzen du gertatutakoa: «Tentsioa zegoen, eta momentu batean ertzainek kargatu egin zuten. Gu manifestazioan ginen, eta Urbieta kalean zenez, portal batera jo genuen korrika, izeba han bizi baitzen. Ama erori egin zen, ez genekien zer zuen. Nik, larrituta, ertzain bati laguntza eskatu nion, eta hark erantzun zidan: ‘neri bost axola’. Alde egin zuten. Anbulatoriora joan ginen laguntza eske, eta 10 minutura-edo iritsi zen anbulantzia». Berandu zen. Barne Sailak emandako bertsioaren arabera, Kontxi Sanchiz ez zegoen manifestazio hartan, eta ertzaintzak kargatu baino lehenago eman zion bihotzekoak. Osakidetzan 13:15etan erregistratu omen zuten anbulantzia eskaera, eta ertzainek 13:21ean kargatu omen zuten.
Kontxi Sanchizen familiak eta Ezker Abertzaleak oso gogor salatu zuten Barne Sailak adierazitakoa, eta salaketa jarri zuten Donostiako Epaitegian. Nagore Gonzalezi mingarriena zaio Barne Sailak emandako bertsioa: «Minik haundiena ematen digu Barne Sailak gertatu zenarengatik gezur horiek esateak. Ez dakigu amaren osasun egoera zein zen, baina manifestazio hartan bazegoela bai. Oso mingarria da hori guretzat».
Urtero Angel Berroetaren familiak gonbidatuta Iruñean izaten da Kontxi Sanchizen familia, egia argitzeko eskatuz. «Salaketa egina dago, Eusko Jaurlaritzan nik hitz egiteko eskaera ere egin zen... eta oraindik ez dugu erantzunik».
«Hernaniarrek badakite zer gertatu zen»
Hernaniarrek adierazitako babesarekin oso eskertuta dago Sanchizen familia. Gonzalezek dio, kontu haiek argitu beharra pixu gertatzen zaiela askotan, «gogoratzen zarenean zauria berriz irekitzea bezala da. Hala ere, orain ere joango nintzateke deklaratzera, eskatuko baligute».