Hernaniko Alkatea Indian da, Kerala estatuan, hango partaidetza eredua ezagutzen. Luis Intxauspek astebete pasako du Keralan, Diputaziak antolatutako bidaian, zehatz esanda, Herritarren Partaidetzarako zuzendaritzak antolatuta. Berarekin batera izango dira, Arantza Ruiz de Larrinaga Foru Zuzendaria, eta Zezilia Herrador Beasaingo udal zinegotzia.
Parte hartzea, legeak egiteraino
Gipuzkoako Diputazioak dioenez Keralako eredua «aitzindaria», ez delako mugatzen proiektu jakin batzuetan herritarren iritzia biltzera. «legeak egiteko prozesuan herritarren parte hartze zuzena kontuan hartzeko urratsak egiten ari dira. Horregatik, Keralako eredua erreferente bihurtu da mundu osoan».
Zazpi eguneko bidaia
Zazpi egunetan ezagutuko dituzte Indiako hego-mendebaldeko estatu horretako hainbat adibide. Horietako bat, Costford Ekimena, baztertzeko arriskuan dauden giza-taldeentzat baldintza egokiak bilatzen ari dena. Etxebizitza prezio egoki batean bilatzen ari dira, eta energia garbiak bultzatzen ere bai.
Beste adibide bat izan liteke, emakumezko baserritarrekin egiten ari diren esperientzia, erakundeetan parte hartzeko bidea irekitzeko.