Anorexia eta bulimia kasuak denok ezagutzen ditugu gertuago edo urrutiago. Azken 20 urteetan kasu kopurua mantendu egin da eta hori ederki daki Garbiñe Agirre Gipuzkoako ACABE elkarteko ordezkariak. Bihar hitz egingo du Biterin, 09:30etatik aurrera.
Inmakulada ikastetxeak bi ikastaro antolatu ditu Heziketa Zikloetako ikasleentzat, baina nahi duten herritar guztiei ireki diete aukera bertara azaltzeko. Jateko trastornoei buruz hitz egingo du Garbiñe Agirrek, 09:30etatik 11:00etara.
Teresa Martin medikuak hitz egingo du giza ugalketari buruz, 11:30etatik 13:00era.
Kasu kopuru beretsua, urtero urtero
Acabe elkarteak 20 urte daramazki lanean Gipuzkoako anorexia eta bulimia afektatuei laguntzen. Garbiñe Agirre da Acabeko ordezkaria, eta Hernaniko Kronikari adierazi dionez urtean 90 kasu berri erregistratzen dituzte beraiek. «Gaixoa bera guregana etortzen denean kontatzen dugu kasu berri bat bezala, eta urtero mantendu egiten da kopurua» dio Agirrek.
Buruko gaixotasun bezala hartzen da anorexia edo bulimia, eta normalean beste arazoren batek eramaten du gaixoa ez jatera edo janarekin konportamendu arraroak izatera. «Alkoholarekin gertatzen den bezala, hainbat izan litezke arrazoiak, pertsona batek bere burua egoera horretara eramateko. Guk tratatzen ditugun kasuetan, jana kontrolatzeko obsesioa jartzen zaio gaixoari».
Kasuistika zabala
Anorexia kasuak oso ikusgarriak izaten dira, eta errazak dira detektatzen, baina bulimia kasuak baino urriagoak dira, «anorexia kasu bakoitzeko hiru kasu bulimia izaten dira». Bulimia kasuak ez dira erraz antzematen eta oso ezberdinak izan daitezke, era askotakoak. Emakumezkoak izaten dira kasuen %90ean, eta gazteak.
Acabe, 20 urtez lanean
Acabe elkarteak 20 urte daramazki gaixoekin eta familia eta ingurukoekin lan egiten. Hernaniko Ongintza Patronatuarekin eta Inmakuladarekin elkarlanean urteak daramazkite. Donostian eta Arrasaten dituzte lokalak. Donostian Mons, 32 helbidean daude. 943 326250 edo www.acabegipuzkoa.org yy