Luis Intxauspe Alkateak Indiara egin duen bidaia dela eta, Hernaniko PSE-EE alderdiak bere ezin ulertua adierazi du prentsa ohar bidez. Alderdi sozialistak dio, erabat lekuz kanpo ikusten dutela Alkateak eta Gipuzkoako beste ordezkari politiko batzuk egin duten bidaia, «munduaren beste puntaraino joan dira, parte hartze prozesuak askoz gertuago ere badaudenean».
«Indiako gizarteak zer ikusirik ez du euskal gizartearekin»
PSE-EEk ez du beharrezkoa ikusten bidaia hori, besteak beste hango eta hemengo gizarteek ez omen dutelako zer ikusirik, «hemen atera ezin duten ze ondorio aterako ote dituzte ba, haraino joanda? Indiako gizarteak ez du zer ikusirik euskal gizartearekin. Keralan gauza haundiak lortu dituzte, hori egia da: Indiako beste lurraldeetan ez bezala, Keralan jende pila bat alfabetizatu dute; genero berdintasuna ere Indiako beste lekuetan baino askoz hobeto dago; bizi itxaropen haundia, mediku zentru asko... Baina kontu horiek guztiak hemen aspaldi lortu genituen. Gainera, hango gizartean zatiketa izugarria dago klase edo kastatan, eta horren arabera bakoitzari status bat ematen zaio jaiotzetik heriotzeraino».
«Ez genekien ezer bidaia honi buruz»
PSE-EEk adierazi du, gain gainetik jarraituko diola gaiari, ikusteko, ea zer aportatzen dien Indian ikasitakoek hemengo parte hartze prozesuei. «Orain arte garbi geratu da Bilduk lidertza falta duela. Bilduren ereduetan daude Maduroren Venezuela edo Indiako parte hartze eredua, baina gero ez dira gai hemengo herrietan parte hartze prozesu benetakoak jartzeko». Horrez gain, informazio falta salatu dute: «Ez genekien ezer bidaiari buruz, eta Diputazioaren bidez enteratu gara».