Astigarraga, Hernani, Ereñotzu, Arano eta Goizuetak leku propioa dute gaurtik interneten. www.kronika.net atariak diseinu berria eta nobedade ugari ditu. Dobera Euskara Elkartearen apustuetako bat da web orria. Berrikuntza nagusietako bat da, aipatutako herrietako notiziak etengabe berrituko direla, egunero herri horietako berri izateko aukera izango dela interneten.
Urumeako Kronika atariaren orrialde nagusian, portada deitzen zaionean, eguneko notizi guztiak agertuko dira, lehentasunaren arabera sailkatuta. Herri bakoitzaren gainean klik eginez gero berriz, herri horietako notiziak soilik ikusteko aukera izango da.
Azpisailak ere baditu web orri berriak: elkarrizketak, kirolak, Jasota Bezala...
Atal berriak, egungo beharrak asetzeko
Notiziak igotzeko tresna bat baino gehiago izan behar du web orri batek eta funtzio hori bete nahi du www.kronika.net orriak ere. Notiziek argazki eta bideoak igotzeko aukera ematen dute, neurri eta erresoluzio hobean. Horrez gain, argazki eta bideo galeriak ere igoko ditu Kronikak; asteburu honetan Inauterietan aterako argazkiekin, esaterako.
Herritarren eta Kronikaren arteko feed back edo joan-etorria ere bilatzen du atari berriak. Notiziak komentatu eta sare sozialetan partekatzeko aukera dago gaurtik. Herritarren Txokoa atala ere sortu du Kronikak. Herritarrek beraiek sortutako notizi eta argazkiak igotzeko aukera izango dute, bertako formularioa beteta.
Eskelak eta iragarki merkeak ere ikusgai izango dira www.kronika.neten. Eta publizitaterako aukera berriak ere izango dira. Banner edo publizitaterako hiru tamaina ezberdin ditu web orriak, denen beharrak asetze aldera. Epe motzean gida komertziala ere martxan izango. Komertzio, instituzio, ikastetxe, anbulatorio... nahi duenak informazioa eman dezake bertan: kokapena, eskaintzak, historia, argazkiak...
Arazo posibleak, asteburuan
Gaur egingo da web orri zaharretik berrirako trantsizioa, eta horrek arazo puntualak eman ditzake. Kronikak barkamena eskatu nahi du aldez aurretik.