SAGARRA eta Sagardoaren festa izango da bihar Hernanin. Goizeko festa izango da, eta besteak beste sagar erakusketa eta sagardo dastaketa izango dira.
Egunaren hasieran
sagar erakusketa
Jaia goizeko 09:00etan hasiko da, Hernaniko Txistulari Bandako txistulariek lagunduta. Ondoren, 10:30etatik aurrera, sagardo mota ezberdinekin erakusketa egingo dute, Plazan. Erakusketan ikusgai izango diren sagarrak honakoak dira: Zabaloenea baserriko Manuel Iradiren sagarrak, Erroxali baserriko Mari Carmen Urangaren sagarrak eta Diputazioak Hondarribian duen Zubieta saileko sagarrak.
Sagardo dastaketa segidan
Jarraian, goizeko 11:00etan sagardoa dastatzeko aukera izango da Plazan. Probaketan Hernaniko 12 sagardotegik hartuko dute parte eta guztira 1.800 sagardo botila jarriko dituzte: Goiko-Lastola, Otsua-Enea, Elorrabi, Zelaia, Altzueta, Larregain, Rufino, Alberro, Iparragirre, Olaizola eta Akarregik.
Edalontzi bakoitzeko
hamabi txartel
Edalontzi bakoitzeko hamabi txartel emango dituzte aurten. Hortaz, sagardo tragoxka bakoitzeko txartel bat eman beharko zaio sagardogileari. Txartelak bukatzerakoan, norbaitek sagardo gehiago edan nahiko balu, beste sei txartel erosteko aukera izango du, euro baten truke.
Neurri hau aurten hartu dute aurreneko aldiz, eta helburua da, alde batetik, sagardoa neurriz edatea, gehiegi edan gabe eta ondo banatuta; eta bestetik, produktuaren duintasuna errespetatzea, neurriz edanez eta gozatuz.
Sagarra jotzen eta biltzen ikusteko aukera eguerdian
Eguerdian erakustaldia egingo dute, sagarra nola jo eta biltzen den ikusteko. Erakustaldia Barkaiztegi sagardotegiko Joxe Mari Irizarrek egingo du. Baita ere, ikusgai jarriko dituzte garai batean sagardoa egiteko erabiltzen ziren erremintak.