Luis Goñi hernaniarrak indartsu egin du igeriketarako buelta eta Donostian jokatu diren igeriketa frogarik gehienak irabazi ditu. Azkena larunbatean, Kontxako Badiako frogan. Nautikotik atera, irla aldera joan eta Pico del Lorotik Nautikora bueltatzen den 2.300 metro inguruko froga jokatu da joan den larunbatean eta hernaniarrak ez du neurriko aurkaririk izan, bakar bakarrik helmugaratu baita. Horrez gain, irlari buelta ematen dion La Perla froga eta Haizearen Orrazikoa ere Luisek berak irabazi ditu aurtengo udan eta Paseo Berrikoan (Zurriolako hondartzatik Kontxarakoan) bigarren gelditu da.
Europako txapelketak
Luis Goñi Europako txapelketan da egunotan Cadizen, Aitor Goñi eta Jon Ander Izuzkizarekin batean eta erakutsi du sasoi puntu onean dagoela. Hala ere, joan den larunbateko proba irabazi ondorenean, nabarmendu zuen erritmo lasaiagoan egin beharko zuela Cadizko proba: «gaur erritmo gogorrean egin dut proba guztia, baina Cadizen 5.000 metro egin behar dira igeri eta xuabeago hasi beharko dut, indarrak piska bat dosifikatzeko».