Joan den urtean pintxoak prestatzeko ikastaroa izan zen eta aurten, Kutxako Nazaret zentroak antolatuta, sukaldaritza ikastaroa izango da Txantxangorri elkartean. Perretxikoak nola prestatu izeneko ikastaroa da eta perretxikoak prestatzen ikasteko aukera izango da izen haundiko sukaldari baten eskutik. Ikastaro hori urriaren 29an hasiko da eta azaroaren 26ra arte ostegunero izango dira klaseak. Ordutegiari dagokionez, arratsaldeko 16:00etatik 18:00etara izango da, beraz, guztira 10 orduko ikastaroa da. Gazteleraz izango da. Apuntatu nahi duenak 44 euro ordaindu beharko du.
Helburua perretxikoekin plater goxoak prestatzea
Perretxikoak gustoko dituenarentzat aukera ederra izan daiteke ikastaroa. Helburuen artean egongo da perretxikoak protagonista izanda, plater ezberdinak prestatzea. Horrez gain, saltsa eta osagarri egokienak zeintzuk diren ikasteko aukera izango da ahalik eta platerik goxoenak prestatzeko.
Programa zabala
Perretxiko mota ezberdinekin egindako errezetak eta teknika ezberdinak ikasi ahal izango dira ikastaroan. Besteak beste, honako platerak: Karraspinak foiez beteak, Gibelurdin konfitatuak, Onddoekin egindako carpaccioa, Xixa-nahaskia, gulaz betetako perretxikoak, Esneardotsuaz salteatutako espagetiak, Saltzaperretxiko Xapo, langostino eta shitakeeekin egindako brotxeta, Onddo kroketak, Marasmio jangarriaz salteatutako barazkiak, Xixa pudina, Gibelurdinak plantxan...
Oilagorretako kotoa Leitzaranen
Leitzarango kotoan oilagorrak ehizatzeko aukera dago. Horretarako, Txantxangorri elkartean daude baimena eskatzeko betebeharreko inprimakiak. Nahi duenak elkartetik pasatzea du inprimakia betetzera.
Sagardo lehiaketako afarian izena ematea
Txantxangorri elkartearen urteroko sagardo lehiaketa hilaren 25ean izango da, hau da, azken ostiralean. Aurkeztuko diren sagardoen artean onena aukeratzeko afaria egingo da eta bazkideek izena emateko aukera dute datorren asteartera bitarte, hilaren 15era arte. Afaltzera joango den giltzadun bazkideak bi lagun eraman ditzake. Gainerakoek 16tik aurrera izango dute aukera izena emateko. Joan nahi duenak 25 euro ordaindu behar du. Lehiaketan 15 sagardok hartuko dute parte. Joan den urtean irabazi zuena ere izango da tartean; Zubietako Astiazaran, hain zuzen.