UDARA bukatzear dela nabaria da iraileko kultur egitarauari begiratuz gero. Ikasturte hasierarekin batera, asko dira hilabete honetarako antolatutako ekitaldiak. Besteak beste, izango dira Euskal Jaiak, Sagarra eta sagardoaren eguna, Gazteen Trikitixa Txapelketa, bi auzotako eguna, eta Urretxa Mikologi Elkartearen erakusketa.
Euskal Jaiak ospatuko dira berriro, 100 urte eta gero
Euskal Jaiak Hernanin azkenekoz egin zirela 100 urte beteko dira aurten, eta hilaren 18tik 20ra berriro ospatuko dira. Hiru egunetan zehar, euskal kulturaren inguruko hainbat erakustaldiz eta ekitaldiz gozatzeko aukera izango da herrian, besteak beste, honakoak: abeltzaintza eta artisautza azoka, herri kirolak, bertso saioak, pelota partiduak eta herri bazkaria.
Sagarra eta sagardoaren eguna
Sagarra eta sagardoaren presentzia ere ez da faltako irailean. Urteroko hitzorduari hutsik egin gabe, Tolarea Gipuzkoako Sagardo Naturalaren Kofradiak Sagarra eta sagardoaren eguna antolatu du hilaren 20rako. Plazan izango da, eta kontuan izanda Euskal Jaiekin batera izango dela, giro ona ez da faltako.
Trikitixa Txapelketa eta Mikologia erakusketa
Irailean baita ere, egun berean, Gazteen trikitixa txapelketa izango da, Plazan, eguerdiko 12:00etan. Txapelketa Kriskitiña dantza taldeak antolatzen du, eta aurtengoa hamaikagarren edizioa izango da.
Hilaren 20an ere, Urretxa Mikologia elkarteak antolatu du urtero egiten den mikologia erakusketa. Plaza Berrira hurbiltzen direnek ikusgai izango dituzte mota askotako perretxikoak.
Auzo egunak
Hil honetan bi auzotako eguna ere ospatuko dute, Latsunbe Berri-Marieluts auzokoa eta Karabel auzokoa. Biak hilaren 19an izango dira.
Hilabeteroko zitak
Aipatutako ekitaldiez gain, hilbetero izaten direnak ere ez dute hutsik egingo. Hilaren 12an Kalez Kale Kantari izango da, 12:00etan Plaza Berritik abiatuta.
Irailaren 13 eta 27an berriz, Igande Musikatuak izango dira, arratsaldeko 18:00etan, Ezkiaga pasealekuan.
Azkenik, hilabete bukaeran, 26an, bigarren eskuko azoka izango da Atsegindegin.