aurten laugarren urtez, Amnistiaren Aldeko Futbito Txapelketa zen egitekoa atzo Hernanin. Joan den ostegunean ordea, Grande Marlaska epaileak txapelketa eta bere inguruko guztia -bazkaria eta mus txapelketa- debekatu zuen.
Atzo herritar talde bat kalera atera zen futbolariz jantzita, porteria eta baloi haundiak beraiekin zituztela, txapelketa debekatu izana salatzeko eta elkartasuna era umoretsuan adierazteko. Ertzaintza bertaratu eta istiluak izan ziren. Istiluetan bi lagun identifikatu zituen Ertzaintzak eta zauritu bat ere izan zen.
Aldarrikapen umoretsua
Herritarren esanetan, helburua zen batetik, txapelketa debekatu izana salatzea, eta bestetik, elkartasun ekitaldi umoretsua egitea.
Bi lagun identifikatuta
Herritarrek adierazi zutenez, hasiera batean Tilosetan elkartu ziren eta ertzainak etorri eta lagun bat identifikatu zuten. Ondoren, taldeak herrian barrena jarraitu zuen, porteria eta guzti. Zinkoenean gora, Plaza Berri aldera abiatu zirenean, ertzainek beste lagun bat identifikatu zuten eta iskanbilak izan ziren. Iskanbilen ondorioz zauritu bat ere izan zen.