beti da garai ona euskara ikasteko, eta orain da garaia izena emateko. Euskara ikasi nahi duenak bi aukera behintzat baditu herrian: udal euskaltegia eta AEK euskaltegia. Biak ere luzatu dute datorren ikasturteko eskaintza, zabala eta behar guztietara egokitua.
Udal euskaltegia
Udal euskaltegian beti bezala, euskara ikasteko aukera eskainiko dute, astelehenetik ostegunera, goizez, arratsaldez edo gauez, egunean bi orduz. Ikasleak tutorea ere izango du bazterrean bere premiak eta zalantzak asetzeko.
Guraso eta merkatarientzako propio prestatutako ikastaroak ere emango dituzte, hauei egokitutako ordutegian, 14:30etatik 16:30etara, umeak eskolan dauden bitartean, eta dendak itxita dauden bitartean, alegia. Astean 6 orduko eskolak izango dira, 3 egunetan hartzeko, bi ordu egun bakoitzean.
Autoikaskuntza zerbitzua ere badute, ikasle bakoitzak bere erritmoan eta bere gisara lan egin dezan, beti ere tutorearen laguntzarekin.
EGA bezalako azterketak prestatzeko talde bereziak ere badira udal euskaltegian.
Horrez gain, erabilera sustatzeko hainbat jarduera ere egiten dituzte, esate baterako, asteburuko barnetegiak, tailerrak eta hitzaldiak.
Izena emateko epea
Izena eman nahi izanez gero, edota informazioa nahi izanez gero, udal euskaltegira (anbulatorio zaharrera) jo besterik ez dago. Hilaren 25a baino lehen eman behar da izena, honako ordutegian: goizez 09:30etatik 13:30etara eta arratsaldez, 16:30etatik 19:30etara. Telefonoa ere eman dute, 943 331 896 eta baita helbide elektronikoa ere: euskaltegi@hernani.net.
AEK-k txupinazoa igandean
Jendea hasia da AEK-ra hurbiltzen izena ematera baina ofizialki bihar emango diote hasiera matrikulazio kanpainari, Pirritx, Porrotx eta Mari Mototsen emanaldiaren ondoren. Pailazoek bukatzean hitzordua jarri dute AEK-ko kideek Atsegindegin bildu eta matrikulazio kanpainako txupinazoa botatzeko. Txupinazoaz gain, sorpresaren bat ere prestatu dute bertara hurbiltzen direnentzat. Porrotxek berak, eta besteak beste, beren koloretako munduan euskarak duen garrantzia azpimarratu zuen eta dei egin zien bereziki gurasoei euskaraz bizi daitezen, «umeek zer ikusi hura ikasi egiten baitute».
Hernanin eta Astigarragan
Astelehenetik aurrera beraz, AEK euskaltegietako ateak irekiak egongo dira. Hernaniko Larramendi kaleko 11ra jo besterik ez dago, edota Astigarragako kultur etxera, honako ordutegian: 09:00etatik 13:00etara eta 17:00etatik 20:00etara.
AEKn ere eskaintza zabala
AEKn ere eskaintza zabala prestatu dute ikasturterako. Euskara ikasteko maila guztiak dituzte, goiz, eguerdi eta arratsaldez, astean bi, hiru, edo lau egunetan joanda.
Autoikaskuntza zerbitzua ere badute, ikasleak bere gisa lan egin dezan, tutorearen laguntzaz. Azterketak egiteko ere prestatzen dute jendea, EGA eta oposaketetako euskara azterketak egiteko, esate baterako.
Ikasleek lasai arraio hitz egin eta praktikatzeko Mintzagunea dute, baita Zalantzagunea ere, zalantzak eta galderak argitzeko.
Horiez gain, asteburuko barnetegiak, irteerak, ekintzak eta abar antolatzen dituzte, ikasleak lotsa galdu eta euskaraz aritzeko.
AEK-k Zilegi Eskolak antolatzen jarraitzeko asmoa du, ikasleek eta inguruko jendeak aukera izan dezan euskaraz egin eta entzuteko kontu interesgarriak ikasiz bide batez.