igandean autonomia arteko Espainiako triatloi txapelketa jokatu zen Leraten (Nafarroa) eta Euskadiko taldeak irabazi egin zuen Peru Alfaro atleta hernaniarra tarten zela. Lehenengo aldia da Euskadiko selekzioak autonomia arteko Espainiako triatloi txapelketa irabazten duena, baina txapelketa jokatu aurretik irabazteko aukerak ikusten ziren; izan ere, sekulako taldea osatzea lortu dute aurten. Triatleta onenak elkartu ziren. Mutilen artean, Alfaroz gain, Mikel Elgezabal, Hektor Llanos, Aritz Egea, Jon Unanue, Aimar Agirresarobe eta Egoitz Zalakain. Nesken artean: Ainhoa Murua, Zuriñe Rodriguez, Miren Casado, Irati Etxaburu, Gurutze Frades, Maider Vallina eta Arrate Mintegi. Sailkapen orokorrean 2.354 puntu lortu zituen Euskadik, Galiziak 2.212 eta Catalunyak 1.973. Emakumezkoetan Euskadik 1.190 puntu lortu zituen, Galiziak 1.056 eta Madrilgo komunitateak 1.001 puntu. Gizonezkoetan aldea txikiagoa izan zen: Euskadik 1.164, Galiziak 1.156 eta Catalunyak 1.013.
Alfaro Espainiako txapelketan
Irailaren 20an Espainiako triatloi txapelketa jokatuko da Cangas de Morrazonen (Pontevedra). Estatu mailako triatloilari onenak bilduko dira eta Alfaro ere bertan izango da. Triatloi honek distantzia olinpikoa izango du: 1500m igerian, 40km bizikletan eta 10km korrika. Alfaroren asmoa lehenengo hamarren artean egotea izango da Kronikari azaldu dionez.