atzo eguerdian inauguratu zuten Urnietako bariantea, Mandazubiko errotonda eta Urnietako Salesiarretako errotonda lotzen dituena. Urumea autobiaren barruan hegoaldeko zatia egin da. Urnieta eta Hernani lotzen ditu, 3,1km ditu eta 41 milioi euroko inbertsioa izan da. Bariantearekin, egunero Urnieta herrigunetik pasatzen ziren 20.000 ibilgailuk ez dute atzoz geroztik bertatik pasa beharko. Inaugurazio ekitaldian izan ziren Markel Olano Gipuzkoako Diputatu Nagusia, Eneko Goia Bide Azpiegituretako Diputatua, Luis M. Apraiz Errepideetako Zuzendari Nagusia, Agustin Lopez de Doriga ingeniaria eta Mikel Izagirre Urnietako alkatea. Olanok Urnietako bariantea irekitzea oso notizi ona dela azaldu zuen. «Urnietak izugarrizko trafikoa jasan izan du eta alternatiba egoki, moderno eta ona da. Egunero Urnietako kaskotik pasatzen ziren ibilgailuentzat alternatiba da eta urrats garrantzitsua urnietarren bizi kalitatean».
Autobia datorren urterako
Horrez gain, gipuzkoar guztientzat dela «berri ona» azaldu zuen diputatu nagusiak, hainbeste arazo sortzen dituen Donostia-Andoain errepideari konponbidea emango dion Urumeako autobia pixkanaka aurrera doalako. Autobia bukatzeko bi muturrak falta dira: Andoaingo saihesbidea eta Donostiako sarrera. Datorren urtean bukatzea aurreikusten dute. Autobiak egunero 30.000 ibilgailu inguru bilduko lituzke.