joan den urtean hiru egunetara luzatu zituzten Zikuñagako jaiak eta aurten ere halaxe, ostiraletik hasi eta asteburu osoan izango da jaiekin gozatzeko aukera. Ostiral arratsaldetik aurrera buruhaundiak, futbito txapelketa eta Altxorraren bila izango dira.
Larunbatean era
guztietako ekintzak
Larunbata eta igandea egun haundiak izango dira Zikuñaga auzoan. Larunbatean, haurrek goizetik izango dute gozatzeko aukera 11:00etatik aurrera antolatu dituzten jokuekin. Jan eta edan nahi duenak, berriz, tortila lehiaketara eta sagardo dastaketara azaltzea besterik ez du eguerdi partean. Arratsaldean ere haurrek izango dute saltsa. 15:30etan ur borroka antolatu dute. Bi ordu geroago pailazoek umore pixka bat jarriko dute eta ondoren, gastatutako energia berreskuratzeko txokolatada izango dute.
Arratsaldeko 19:00etan, bezperan hasitako Zikuñagako Ama Futbito Txapelketako finala jokatuko da. Gauean, 21:30etan afaria egingo da eta ondoren, irrintzi lehiaketa. Gaua girotzeko kontzertu sorta ederra ere izango da: Síndrome de Parker, Rockerrenak, Wha Wha Buga Band eta Aduraspenas taldeek joko dute.
Azken egunean herri kirolak
Igandean bukatuko dira jaiak Zikuñagan eta azken egunerako ere ekintza mordoa prestatu dute. Goiz-eguerdi partean marrazki lehiaketa eta puzgarriak izango dira. Arratsaldeko 17:00etatik aurrera berriz, herri kirolak nagusituko dira. Ordu bete geroago, show-a izango da, Zo Zongo Perkushow, hain zuzen. 19:30etan merienda egingo da auzotarrentzat eta ondoren, Eduri omenaldia eta sendiari lore eskaintza. Ilunabarrean, Dantzaldi Karroza izango da eta 21:30etan bukatuko dituzte jaiak zezen suzkoarekin.