koloretako mundua nahi dute Pirritx, Porrotx eta Mari Mototsek. Mundu horretan herri guztiak, hizkuntza guztiak eta musika ere kabitzen dira, besteak beste. Igandean Hernanira etorriko dira hiru lagunak, Piratak diska aurkeztera, Hernaniko Musika Eskolako akordeoilari taldeak deituta. 18:00etan etorriko dira, kiroldegiko frontoira.
Akordeoilariei laguntzeko
Musika eskolako akordeoilari taldeak antolatu du kontzertua. Maribel Insaustik, atzo arte musika eskolako zuzendari izandakoak, adierazi zuen bezala, helburua dute udazkenean Parisera joatea kontzertu bat ematera eta horretarako sosak behar dituzte. Pailazoek pozik hartu zuten gonbitea beren bizitzan «musika ezinbesteko erreminta bihurtu baita».
AEKren txupinazoa
Hernaniko AEK-k ere lagundu du ekitaldia antolatzen eta Porrotx-ek jende guztia animatu zuen euskaltegian izena ematera, «askotan ez delako nahikoa umeek eskolan ikastearekin, hauek zer ikusi hura ikasi egiten baitute». Emanaldiaren ondoren, AEK-k matrikulazioa kanpainaren txupinazoa botako du Atsegindegin eta sorpresaren bat izango da.
Udalak ere lagundu du kontzertua antolatzen, Usoa Barrutiabengoa zinegotziak adierazi zuenez, Udalak beti babestu dituelako, «musika, hizkuntza eta bestelako balioak transmititzen dituzten ikuskizunak».
Sarrerak salgai
Sarrerak salgai daude kiroldegiko Atxiki tabernan eta Elkar liburudendan, 6 euroan.