Udaran ere Mendebaldeko Sahara gogoan dutela eta, saharar herriaren eskubideak aldarrikatu zituzten joan den ostegunean, Donostiako Kontxa hondartzan. Gipuzkoako bazter guztietatik hurbildutako sahararrek eta sahararren hainbat lagunek, hondartzan bildu eta Saharak aske izateko duen eta herritarrek beren etorkizuna erabakitzeko duten eskubidea aldarrikatu zuten.
36 urte borrokan
Prentsara bidalitako oharrean, bertan bildutakoek salatu zuten saharar herriak, 36 urte borrokan eman eta gero, Marokok zuzendutako «sarraski baten biktima» izaten jarraitzen duela, nazioarteko komunitatearen isiltasunaren laguntzarekin.
Komunikatuan salatu zuten Marokok ez dituela bete Nazio Batuak agindutakoak eta sahararren giza eskubideak behin eta berriz zapaltzen dituela. Era berean gogoratu zituzten preso dauden sahararrak eta desagertuta dauden 500dik gora lagunak. Beraien inguruan zabaldutako harresia eta minak salatu zituzten, sahararrak errefuxiatu kanpamenduetan bizitzera derrigortzen dituztenak. Beraz, Marokori mendebaldeko saharatik «alde egitea eta nazioarteak agindutakoa betetzea» eskatu zioten.
Nazio Batuei kritika
Era berean gatazkaren aurrean Nazio Batuen «arinkeria eta isiltasuna» salatu zituzten eta bere aginduak betearaztea eskatu zioten.
Espainiako Gobernuaren jarrrera ere salatu zuten Mendebaldeko Saharan duen erantzunkizunaren aurrean «beste alde batera begiratzeagatik».
Azkenik, herri sahararrak autodeterminaziorako duen eskubidea aldarrikatu zuten.