OIANUME erreka, zati haundi batean zeharo kanalizatua doa, batez ere Martindegi auzoan. Errekaren degradazio maila altua da eta dibertsitate altua egotea eragozten du. Berez, Polipasoko erreka izenarekin jaiotzen da Astigarragako lurretan eta Hernaniko lurretatik igaro ondoren, ostera, Astigarragan elkartzen ditu urak Urumea ibaiaren ubide nagusiarekin.
Ibaiertzeko basoaren egoera
Errekaren sorburu aldera, Hernaniko herri lurren barruan, ibaiertzeko landaredian haltza, lizarra eta urritza ikusten dira, baina platanoa eta sasiarkazia dira batez ere ibaiertzean zabaltzen direnak. Budleja davidii bezalako landare inbaditzaileak ere badira.
Martindegin, berriz, ibaiertzean landare gutxiago dago, hara iristerako erreka baratza eta etxe artetik igarotzen baita.
Arriskuak eta proposamenak
Erreka guztiz aldatua dago: ibaiertzean zuhaitz aloktonoak edo kanpokoak daude, erreka kanalizatua dago, etxebizitzen artean eta errepidearen albotik zati haundian. Ahal izanda ibaiertz naturala berreskuratu beharko litzateke errekari bere konplexutasuna emateko.