goizuetan jaiak bete-betean dira eta gaur igandea izanda aitzakia faltarik ez da festarako. Eguna ekintzaz betea izango da gainera. Atzo bezala, goizean diana, entzierroa eta txistulariekin erraldoi eta buruhaundiak izango dira. Eguerdian, 12:30etan, pilota partidua eta arratsaldeko 17:30etan zezenak. Horrez gain, Umore-Ona dantza taldea ariko da 19:00etan, eta gauerdian, kontzertua gaztetxean. Laiotz eta Igandea txaranga ere ariko dira.
Pilota partiduak egunero
Aurten ere pilota partiduak ikusteko aukera izango da egunero Goizuetan. Atzo, Yoldi eta Linzoain nafarrek (Huarte eta Eugi) irabazi zuten 25-18, Larrañaga eta Galarraga gipuzkoarren kontra (Azpeitia eta Orio). Gaur Gorrotxategi hernaniarra ikusteko aukera izango da, aurrean Zaratamoko Elezkano duela, bi gipuzkoarren kontra, Renobales eta Albisu (Alegia eta Ataun). Bihar, Narbarte goizuetarra eta Zubiri berastegitarra ariko dira Mitxelena eta Telletxearen kontra (Arantza eta Bidania). Aurten, jaialdian partidu bakarra denez, 25 tantora ari dira jokatzen. Azkenik, asteartean, bi partidu izango dira. 4 1/2-an, Rico errioxarra ariko da Garralda Huartekoaren kontra, eta ondoren Arano eta Goizueta neurtuko dira: Aranotik Zabala eta Legarreta, eta Goizuetatik Apezetxea lehengusuak.