CHILLIDA-Lekuko parajeek artea eta musika uztartzeko baliabide ezin hobeak dituzte. Bihar esaterako, bertara hurbiltzen direnek, arteaz gozatzeaz gain, Roger Muraro pianojolea entzuteko aukera ere izango dute, Donostiako Musika Hamabostaldiaren barruan.
Murarok piano txapelketa garrantzitsuak irabazi ditu, esaterako Tchaikovsky eta Franz Listeko txapelketak. Biharko kontzertuan Ravel musikariaren obra interpretatuko du, bere musika inpresionista oinarri hartuta. Guztira Ravelen 18 abesti interpretatuko ditu. Pianojolea ikusi nahi dutenek, aukera izango dute, bi saio izango baitira: aurrenekoa arratsaldeko 18:00etan, eta bigarrena arratsaldeko 19:00etan. Sarrerek 10 euro balio dute.
Musika eta olerkiaren
arteko elkarrizketa
Musika Hamabostaldiaren barruan, Chillida-Lekun beste bi kontzertu ere izango dira. Hurrengoa datorren asteburuan izango da, hilaren 23an. Bertan, musika eta olerkiaren arteko elkarrizketaz gozatzeko aukera izango da, Judith Jauregi pianojolearekin eta Kirmen Uribe olerkariarekin. Judith Jauregik interpretatuko ditu, besteak beste, Ravel, Albeniz eta Bartok musikarien obrak. Momentu berean, Kirmen Uribek errezitatuko ditu Unamuno, Lauaxeta, Orixe eta Lizardiren poemak. Emanaldia arratsaldeko 19:00etan izango da, 10 euroan.
Mena hilabete amaieran
Hamabostaldiko azken kontzertua, Chillida-Lekun, Carlos Mena kontratenorearena izango da. Emanaldian, Carlos Menak lagun izango du taulagainean Susana Garcia de Salazar pianojolea.
Kontratenorearen berezitasun nagusia da ahots nahastezina duela, eta hortaz oso ezberdinak diren lanak jorra ditzakeela. Abuztuaren 30eko kontzertuan, besteak beste, honako lanak interpretatuko ditu: Aita Donostiaren Euskal Preludioak, Isaac Albenizen Otoiz eta Zambra, eta Enrique Granadosen Quejas o la maja y el ruiseñor. Kontzertua hilaren 30ean izango da, arratsaldeko 19:00etan, eta sarrerak 10 euro balio du.