aurten Amabirjin bezpera ostiralean da eta halaxe, egun horretan hasiko dira jaiak Goizuetan. Eguerdiko 12:00etan udaletxeko balkoitik jaiei hasiera emango dien itxaferoa botako dute Umore-Ona Peñaren sortzaileek, 50garren urteurrena aprobetxatuz. Jaiak girotzen lehenengoak gazteak izango dira, gazte eguna izango baita etzi. Datorren asteazkenera arte iraungo dute jaiek.
Trikitilariak eta bazkaria
Jaiei hasiera eman ondoren, trikitilari, erraldoi eta buru-haundiekin kaleetan barrena ibiltzeko aukera izango da. Eguerdiko 13:00etan, triki poteo gaztea antolatu dute Solano eta Jon Marirekin. Jaia ez da edatea bakarrik eta bazkari ederra ere izango da. Paella jatea izango da 14:30etan.
Kuadrilen `joku xelebreak´
Gazte eguna izanda, ezin gazte kuadrilen arteko joku xelebrerik gabeko eguna izan. Saltsa ederra jarriko dute aurten ere 17:30etatik aurrera. 20:00etan, gazte txupinazoa izango da gaztetxean eta txupinazoaren ondoren, 20:30etan, Umore-Ona peña Ganyegitik irtengo da Igandea txarangarekin.
Gauerdian, dantzaldia izango da Garraxi taldearekin eta dantzan jarraitu nahi duenak aukera izango du ondoren, Igandea txarangarekin.